以往都同史友們介紹過，喺古代嘅封建皇朝當中，帝皇為咗可以保存皇室血統嘅純正，同時又要應付後宮當中嘅一啲粗重工作，所以就設計太監呢種慘無人道嘅職業出嚟。歷朝歷代都沿用太監呢種制度，但到底點解清朝嘅太平天國偏偏就冇太監出現呢？背後原因其實相當血腥。
其實同歷朝歷代嘅帝皇都一樣，作為太平天國嘅領導人，沉迷女色嘅洪秀全其實相當擔心自己嘅妃子接觸到其他男人，佢甚至仲曾經下令所有臣子都唔可以「窺看後宮面者」、「後宮姓名位次永不准臣稱及談及」，假如有違者就會即斬不赦。
一位咁怕其他男子接觸到妃子嘅人，喺處理後宮事務上其實都係需要有宦官幫忙，然而太平天國之所以冇太監並唔係因為專登唔做，而係因為能力上做唔到！要知道古代嘅「閹割」係一門專門嘅技術，喺晚清名臣曾國藩下令搜集嘅《賊情匯纂》就有記載，太平天國就曾經下令擄走二百幼孩進行閹割，希望將佢哋變成宦官。但經過閹割之後，二百幼孩基本上無一生還，呢個就係點解太國天國有大量女宮嘅原因喇！
原圖嚟自網絡