喺現代嘅考試制度當中，其實大部分嘅制度都有分門別類分埋學科，揀好學科嘅考生仲會知道考試嘅範圍，之不過喺古代嘅科舉考試當中，考生要應付嘅唔單止係四書五經、詩詞歌賦，仲會有各種奇怪嘅問題，阿史今次就同大家講一講啦！
喺古代嘅科舉制度中，雖然四書五經、二十四史以及一啲時事題都係必考嘅題目，但為咗可以考核考生嘅應變以及關聯能力，所以仍然都會有一啲出其不意嘅題目，就好似「截搭題」，即係將兩句無關嘅句子拼合埋一齊，但又要令到成句句子有合理嘅意思。
其他生僻、古怪嘅題目仲有通過知識儲備以及推理先至可以做到嘅，例如出「得見也」三字要考生猜出成句句子，又或者只出一個數字，就要考生推理出到底呢個數字可以連繫到邊一部經典，例如由「二」字推理出「二，吾猶不足，如之何其徹也」，所以古代考試真係唔簡單！
原圖嚟自網絡