之前阿史都介紹咗唔少故仔，話响河同湖乾涸時原本沉响湖底河底嘅古跡出現，呢次就到洞庭湖喇！
位於湖南省北部嘅洞庭湖，近期水位持續維持住低位，結果網友响洞庭湖畔航拍時，發現湖床上有一片暗紅色嘅大規模方形圖案。呢啲圖案每個成方塊狀，睇落去似個小迷宮，大方塊周邊又散落唔少小方塊，明顯係人造物。所以就有網友猜測，呢個可能係古城遺址，又或者係古代墓葬群。
不過，管理洞庭湖嘅部門專家就話呢啲唔係古城遺址，亦唔係古代墓葬群，而應該係矮圍。矮圍即係响湖裡築起矮壩，用嚟圍起一片水域，當湖水上漲時等啲魚蝦進入，水退後啲大小魚蝦就滯留圍內，啲人就可以去打撈。如果係咁，又真係講得通喎。