今時今日如果形容讀書人青靚白淨、斯斯文文,大家可能都會諗起「白臉書生」呢個詞,之不過呢個詞喺古代其實係偏向貶義,甚至仲係直指該位書生缺乏經驗、不懂世事。咁到底最初引起「白臉書生」呢個講法嘅人,實際上又做過咩事呢?阿史今次就同大家講一講啦!
要介紹「白臉書生」呢個講法點嚟,就要由南北朝時期講起。當時南北朝就有個宋朝人叫做沈慶之,佢擅長行軍打仗,亦都為國家立下唔少戰功,所以就被封為「建武將軍」,專門負責鎮守邊疆。之不過,凡係國家君主都係希望可以擴闊自己國家國土,文帝亦都唔例外,一直都想展開北伐擴展領土。為咗阻止文帝,沈慶之已經多次出言阻止。
文帝對此就相當反感,甚至仲搵嚟兩個文官不斷同沈慶之爭論,最終成功搞到沈慶之放棄,並且無奈地講出「治國譬如治家,耕當問奴,織當訪婢。陛下今欲伐國,而與白面書生輩謀之,事何由濟!」大意就係話如今大王要攻打其他國家而搵「白面書生」嚟商量都唔信武將意見,此仗又點可能成功呢!
結果,文帝冇採取沈慶之諫言,國家第二次北伐亦都失敗收場,沈慶之口中「白面書生」嘅講法亦都喺民眾當中廣泛流傳。
原圖嚟自網絡