唔知史友有無留意，最近「中國傳統製茶技藝及其相關習俗」被列入聯合國人類非物質文化遺產代表作名錄，令中國世界級非遺數目達到43個，位居世界第一。講到飲茶，廣東人對飲茶熱愛唔會比其他省份嘅人輸蝕，而廣東本身都係一個茶類最大集散地同消費地，而全省產茶縣至少有65個以上之多。
不過咁，响中國十大名茶當中，好似就無一款係產自廣東，點解會咁呢？呢個其實係同中國人飲茶傳統習慣有關。回顧中國十大名茶，大部分都係綠茶類，而綠茶出產通常係响北緯30度上下5度區間，而中國綠茶傳統代表性產區就係响浙江、安徽、河南等，雖然廣東也有出產綠茶，但無論名氣及質量似乎都比唔上綠茶傳統代表性產區。至於烏龍茶同埋紅茶、黑茶等，都因為地方傳統習慣關係而令廣東嘅茶無乜名氣。講到尾，一來氣候水土唔啱某類茶種，二來傳統留落嚟名氣累積唔夠，所以廣東出產嘅茶葉就上唔到去十大名茶層次。