近日天氣慢慢變凍,喺其他地方甚至仲落起大雪,咁就意味住好多冬季活動都可以展開。現代人諗到滑雪、溜冰等等嘅刺激運動,咁古人喺呢啲寒冷嘅冬季當中又會玩啲乜呢?阿史今次就同史友們介紹下清朝嘅冬季運動會啦!
其實歷史上對於冰天雪地中可以玩嘅活動都有唔少記載,例如原始突厥會戴毛皮護具、腳踏滑板「一日可行三百里」、喺北宋年間亦都有「俗乘木馬馳冰上,以板藉足,屈木支腋,蹴輒百步,勢迅激」嘅冰床競速,冬季嘅活動其實都有好悠久嘅歷史。
而去到清朝,由於滿族人一直都係居住喺北方,所以冰上運動對佢哋並唔陌生。喺《大清會典》中,冰上活動更係被列為每年10月嘅盛事。每年都會喺八旗士兵當中挑選出過千名滑冰好手,喺接受完相關訓練之後,佢哋就會分別參加名為「搶等」嘅競速滑冰、「搶球」冰上橄欖球以及冰上武術、冰上雜技等等嘅活動,真係如現代冇乜大分別!
原圖嚟自網絡