繼續同史友們介紹世界各地嘅文物趣聞,要知道文物被盜竊一直都係唔少國家面對嘅重大問題,而近日西班牙警方就憑住長時間嘅調查,成功搵到300幾件考古文物,阿史今次就同大家講一講啦!
其實早喺去年西班牙警方就已經喺當地村莊加塔德戈爾戈斯嘅一個房屋搵到「古代骨骼遺骸」存在。當時考古學家就已經斷定呢啲遺骸嘅年份係可以追溯到4000-5000年前,而擁有呢啲遺骸嘅人並冇任何文件解釋到佢哋嘅來源。
隨後,嫌疑人就同警方合作,最終就喺附近城市德尼亞再發現到350件古文物,由青銅時代嘅磨坊、羅馬織布機、腓尼基雙耳細頸瓶等各種文物都一應俱全,當中仲有好多骨頭嘅碎片。雖然屋主就堅稱係喺親戚去世後繼承返嚟,但警方都係指出屋主並冇持有呢啲文物嘅正當性,所以呢宗案件亦都被稱為係「亞利坎提省最大的非法私人收藏之一」。
原圖嚟自網絡