繼續同史友們介紹我國最新嘅考古文物現況，相信史友們對於三星堆3號「祭祀坑」銅頂尊跪坐人像以及8號「祭祀坑」神獸都唔會感到陌生，自呢兩件文物出土以嚟，一直都有唔少學者市民關心到底文物嘅原型應該係點。近日，四川省文物考古研究院就公布咗幾組相片畀大家睇！
近日考古團隊就利用數字三維模型，將三星堆3號「祭祀坑」銅頂尊跪坐人像與8號「祭祀坑」神獸進行成功拼對。要知道呢兩件銅器都係喺三星堆新發現嘅6個「祭祀坑」當中出土，本身就已經極具代表性。所以喺出土之時，專家就利用咗數字三維模型技術將文物進行「另類」保護。
而自文物出土以嚟，考古學家以及文物保護專家通過仔細觀察發現，神獸尾巴部分有兩個凸起，其細節、尺寸都同3號「祭祀坑」出土銅頂尊跪坐人像相合。再加上1986年2號「祭祀坑」出土神壇上嘅神獸頂人、人頂尊造型，就假設兩件文物可以拼對在一起。
通過三維模型喺電腦上進行虛擬拼對之後，唔單止避免到因為挪動文物而可能造成嘅損傷，仲可以精準咁印證到相關嘅假設，真係犀利！
原圖嚟自網絡