近日阿史就喺網絡上睇到一條影片,影片當中就係描述喺1976年1月8日,周恩來總理逝世嘅消息傳出後,毛澤東悲痛萬分不說一話、朱德元帥向周總理敬上軍禮,而喺周總理出殯當日,十里長街之上仲有百萬群眾為佢淚別。到底當時周恩來離世之時,群眾嘅反應又係點樣呢?阿史今次就同大家講一講啦!
喺1976年1月8日,早已傳出病危嘅時任國務院總理、全國政協主席周恩來最終就因為膀胱癌於北京三〇五醫院逝世,終年78歲。聽到呢個消息後,唔單止係毛主席、朱德元帥悲痛萬分,就連鄧小平、葉劍英都哭紅雙眼,李先念、陳永貴甚至仲激動都行唔到路。而呢個消息喺9號傳出之後,首都天安門、新華門、勞動人民文化宮下半旗誌哀,街頭上嘅民眾臉色都係相當沉重,列車上有軍人「捶胸痛哭」,大家都係相當傷感。
而喺1月11日,周恩來遺體送往北京八寶山革命公墓火化當日,北京百萬群眾自發聚集喺天安門東西長安街兩側,喺嚴寒中淚別周恩來,亦即係著名嘅「十里長街送總理」。隨住遺體火化,眾人亦都遵從總理遺願,骨灰由總理妻子鄧穎超交由郭玉峰、羅青長、張樹迎、高振普四人撒到北京長城、密雲水庫、天津海河入海口及山東濱州渤海黃河入海口,令到總理可以回歸佢最愛嘅神州大地!
原圖嚟自網絡