繼續同史友們介紹世界各地嘅一啲最新考古研究，近日喺國際考古學期刊《劍橋考古學雜誌》（Cambridge Archaeology Journal）當中就有一份研究指出，喺2萬年前嘅冰河時期，舊石器時代嘅人類就曾經喺洞穴當中繪製咗一啲特殊嘅符號，亦都係人類原始書寫嘅最早例子，但到底呢啲符號有咩意思呢？阿史今次就同大家介紹下呢份研究報告啦！
最初就有一位嚟自倫敦嘅家具修復師培肯（Ben Bacon）就對呢啲洞穴壁畫進行觀察並分析數據，而隨住英國杜倫大學（Durham University）教授、倫敦大學學院（University College London）教授加入之後，佢哋唔單止喺歐洲各地洞穴牆壁及可攜式物品上搵到600幾幅帶有線條、點、「Y」字符號嘅畫作，甚至仲分類出超過30種非具象符號。
而隨住研究繼續深入，研究人員就對3種符號展開研究，並且對歐洲原牛、鮭魚、馬等動物進行記錄，了解佢哋交配、分娩或遷徙等特定類型活動月份。喺各方數據推測之下，考古團隊就認為呢啲史前洞穴符號「Y」符號代表分娩，不包含「Y」符號嘅線及點嘅長度說明交配期，再配合返動物嘅圖案，就成為咗府河時期人類狩獵嘅重要線索，至於其他符號有咩意思，就需要進一步嘅研究先知喇！
原圖嚟自網絡