喺嚴寒嘅天氣之下，人類總係會嘗試以動物嘅皮毛製成衣物禦寒，所以大家不時都會見到各式各樣嘅皮草出現，既係為咗時尚，又係為咗保暖。之不過，到底係呢種以動物皮毛製衣嘅方式又係喺幾時開始呢？最近嘅一份考古研究就可能畀到啲啟示大家！
近日國際科學期刊《人類演化期刊》最新刊登嘅一份德國考古研究當中就指出，早喺舊石器時代人類就已經利用洞熊毛皮做成衣服以度過嚴冬。雖然毛皮以及皮革等等嘅有機物質係冇辦法保存到超過10萬年，但考古學家就喺德國北部薩克森邦（Lower Saxony）舍寧根（Schöningen）發現到一隻30萬年前嘅洞熊爪竟然有切割嘅痕跡。呢樣發現好大機會係反映，史前人類對洞熊剝皮以獲取皮毛。
而喺科學角度出發，作為大型動物，洞熊體型與北極熊相約，皮毛具有形成透氣保護層嘅長外毛以及提供良好絕緣效果嘅短毛髮，作為保暖衣物嚟講係相當充足！
原圖嚟自網絡