史友們如果去過港島大浪灣、南丫島、蒲台島等，都可能見過千年古石刻。呢啲有幾千年歷史嘅古刻印證咗幾千年前香港地區已經有人類活動。事實上，珠三角一帶有唔少遠古時代人類活動嘅痕跡，就好似珠海咁，就有中國南方地區面積最大、內容最豐富嘅早期岩畫。
呢個有「嶺南第一岩畫」美譽嘅地方，就係珠海市嘅寶鏡灣岩畫。話說响1989年10月，珠海市博物館考古工作者就响當地嘅高欄島進行文物調查，發現咗呢啲岩畫。岩畫圖案密集又複雜，形狀如船、波浪、龍蛇、舞蹈人等，5處一共有7幅岩畫，其中最大一幅有成5米長3米高。經專家考證，寶鏡灣岩畫估計係距今四五千年前新石器時代晚期嘅產物，亦係南越古先民生活寫照或圖騰崇拜。後嚟考古工作者又响岩畫附近地區，發現咗面積2萬多平方米嘅沙丘連山崗遺址，出土大量陶器、石器、玉器、水晶器等遺物以及居住遺跡。呢啲發現都證明咗珠三角地方老早就已經有人類活動。
原圖：dfz.gd.gov.cn