喺古代嘅封建社會嚟講，皇帝可以話係「為所欲為」嘅存在，只要有佢哋睇唔慣嘅事、憎恨嘅人，隨時將佢哋處死都不在話下。之不過，喺康熙年間，就有一位連康熙都唔敢殺嘅大臣，阿史今次就同大家講一講啦！
姚啟聖實際上係一個明末清初嘅人物，出生喺浙江嘅佢明朝之時就已經係諸生，性格愛好遊歷，本來就未必會加入清政府，但就因為喺遊歷於北直通州受辱於土豪，於是就選擇歸附滿洲旗軍，一上任後就立即將呢個土豪杖刑打死，棄官而走。及後喺路上佢又見到兩個清兵淩辱女子，甚至設計誘殺了二人救出女子，十足十古裝片當中嘅大俠。
之不過去到康熙年間，佢都係被授廣東香山縣知縣，但又因為被廣東總督盧興祖彈劾「與澳門葡萄牙人勾結，擅開海禁」而失去官位。之不過，佢又因為喺三藩之亂組織團練數百人，捐納家財十五萬兩白銀、剿平紫山土寇，而被疏薦姚啟聖接任福建總督，續與台灣鄭氏政權進行談判。
講到呢度，可能唔少史友都知道姚啟聖曾經參與平定台灣，最終被康熙授予靖海將軍，封靖海侯。雖然姚啟聖為清朝立下大功，但實際上佢內心從未真正歸順清朝，官場上多次「作死」嘅姚啟聖鋒芒畢露，唔單止令到自己多次失去官位，甚至令到康熙多次想將佢殺死。但即使係皇帝，康熙都因為「平台心切」以及姚啟聖前朝漢人嘅身份已唔殺得佢。
原圖嚟自網絡