喺古代封建社會當中,皇親國戚作為皇權嘅代表,地位都係比人高一等,即使犯咗咩大罪,好可能都會得到皇帝嘅網開一面。之不過,到底點解號稱係漢朝第一美女、漢武帝相當寵愛嘅女子衛長公主又會被傳落得一個被腰斬嘅殘忍下場呢?阿史今次就同大家講一講啦!
衛長公主係漢武帝同衛子夫所生嘅長女,皇帝嘅女兒都係叫做公主,但只有皇帝嘅姐姐或者妹妹先至可以叫做「長公主」,所以被越級稱為「長公主」嘅衛長公主嘅地位絕對遠超其他公主。關於衛長公主嘅身世史書其實冇太詳細嘅記載,只係知道佢係武帝第一個孩子,舅父係大司馬大將軍衛青、表哥係大司馬驃騎將軍霍去病,家世嚟講已經係相當誇張。
之不過,一個地位咁超然嘅皇親國戚點解最後又被傳被武帝腰斬呢?咁就同衛長公主第二段婚姻有關。衛長公主第一段婚姻係下嫁第五代平陽侯曹襄,但點知曹襄逝於元鼎三年,年輕嘅衛長公主就喺元鼎五年下嫁方士欒大,當時仲得到漢武帝給予她10萬斤黃金作為嫁妝,並且受封鹽邑。之不過喺征和元年,丞相公孫賀之子公孫敬聲被人告發用巫蠱咒武帝,慘被原為趙王劉彭祖上賓江充陷害嘅衛長公主據傳亦被當成主犯被武帝一同判處腰斬,呢宗西漢最大冤案最終導致幾萬人死亡。
原圖嚟自網絡