繼續同史友們介紹我國最新嘅考古發現，近日喺2022年度陝西重要考古發現新聞發布會上，西安市文物保護考古研究院就公布咗隋唐長安城最新考古成果，除咗有對小雁塔歷史文化片區綜合改造項目之外，同時仲有一項重大發現，阿史今次就同大家講一講啦！
喺位於皇城朱雀門外1,200多米外，考古團隊就發現到五橋並列遺址，呢個遺址係同朱雀門、明德門遙相呼應，要知道隋唐長安城朱雀大街係連接住皇城朱雀門與外郭城明德門嘅南北向大街，直頭就係隋大興唐長安城中軸線，所以呢個佈局亦係都城禮制嘅最高等級。
據了解，今次考古團隊就發掘咗隋唐長安城朱雀大街、外郭城第七橫街、橫穿朱雀大街水渠，唔單止發現到渠上5座橋樑基址，同場仲有出土陶器、釉陶器、唐三彩、瓷器、銅器等各類文物350餘件。當中最重要嘅橋樑基址唔單止有助重新測量朱雀大街實際寬度，仲係我國目前最古嘅五橋並列遺址，真係犀利！
原圖嚟自網絡