尋日介紹咗傳統上年廿四要開炸,到咗年廿五呢就要蒸糕喇!
响傳統中國社會,無論係北方抑或南方,過農曆新年個陣大部分地方都有蒸糕習慣。响古代,認為年糕諧音「年高」,意味住蒸糕後之後個年就會蒸蒸日上、步步高升,因此年廿五蒸糕都係為咗拎個好意頭。不過,阿史聽長輩講過,長輩老人家們唔會咁輕易將呢個工作交俾後生一輩,原因係萬一啲糕蒸得唔好,意味著未來一年都唔會有好日子過,所以怕年輕仔唔熟手蒸得差,所以通常都會係有咁上下份量同輩份嘅人去做呢個艱鉅任務。
而响傳統上,都會選擇年廿五去蒸糕,要揀呢個日子原因係古時有人相信新春期間不宜開火,所以要預先準備各式糕點同賀年食品,所以就有年廿四開炸、年廿五蒸糕嘅習俗。
原圖嚟自網絡