太平天國運動係清朝後期最後一場由農民起義創建農民政權嘅大規模戰爭，喺呢場運動當中由曾國藩領導湘軍攻陷天京、幼天王洪天貴福被俘而告終。雖然話係農民起義，但喺過程當中洪秀全就對封建社會帶嚟咗唔少新嘅思想衝擊，例如創立拜上帝教、廢除三綱五常對婦女嘅束縛，甚至仲頒布五條軍紀，設立女營，亦即係太平天國女兵！
全盛時期嘅太平天國女兵女數多達十萬人，喺男女士兵共同努力之下，清軍亦都一度被打到節節敗退，而女兵當中亦都出過洪宣嬌、傅善祥嘅名將。咁到底呢支太平天國女兵後來嘅下場又係點呢？阿史今次就同大家介紹下啦！
雖然太平天國女兵嘅創立曾經都為女性帶嚟唔少希望，似乎被壓抑上千年嘅女性地位有望被提升，之不過隨住太平天國定都天京，政權亦都開始腐敗，起初嘅男女平等諗法亦都拋諸腦後，太平天國女兵喺呢個時期就只係成為洪秀全以及各位王爺挑選嬪妃嘅主要來源，而其他有個別手藝嘅女兵亦只係充當軍隊後勤，待遇奇差！
而喺太平天國戰敗之時，戰場上由於兵力不足，唔少女子、孩童就被送上戰場成為炮灰；至於已經投降咗嘅女兵，就會被清軍蹂躪、賣到青樓又或者折磨至死，終究都係封建社會當中嘅犧牲品。
原圖嚟自網絡