早排就同史友們介紹咗周幽王到底係咪因為「烽火戲諸侯」而招致自身滅亡，而今次阿史就同大家介紹另一位被認為係「亡國妖姬」嘅人物，佢就係北齊後主高緯嘅妃子馮小憐喇！
馮小憐原本係皇后身邊嘅侍女，但喺皇后失寵後，皇后為咗可以重新得到皇上嘅寵愛同信任，就將能歌善舞嘅馮小憐送咗畀皇帝，後來馮小憐就將高緯迷倒，自己仲成為淑妃。
得到權勢之後，馮小憐就同高緯出雙入對，高緯亦都變得更加荒淫無道。喺西元576年，當時北周就有大軍攻打平陽城，而對於呢場戰爭高緯並冇太重視，反而係同馮小憐外出打獵。就算當時士兵多次向高緯報告，高緯都冇點樣理會。直到平陽城被攻陷，高緯先打算率軍救援，但點知馮小憐仍然想繼續圍獵，令到救援行動中斷。類似嘅事件唔止發生一次，晉州都失陷之時，高緯又再次因為馮小憐而錯失取回晉州嘅機會。
後來，高緯親自率領數十萬大軍同北周對戰，馮小憐亦都一同觀戰。當兩軍交戰之時，北齊軍隊只係稍稍後退少少，隨即就令馮小憐大叫「軍敗矣」，並且引起周圍官員附和，高緯就帶住馮小憐一起逃走。本來平穩嘅兩軍交戰，最終就因為馮小憐「軍敗矣」三隻字，令到北齊軍隊群龍無首，30萬大軍潰敗。
原圖嚟自網絡