今日係大年初三，唔少人今日去沙田除咗拜車公之外，仲會去沙田馬場搏命，因為今日有賀歲馬。响以往，賀歲馬同賀歲杯足球賽都係唔少香港男人過年重視嘅節目，咁史友們又知唔知香港幾時有賀歲馬呢？
農曆新年賽馬日係始於1970年，至今已經有半世紀歷史。最初賀歲馬係响跑馬地馬場舉行，到咗1992年移師沙田馬場，成為咗香港其中一個新春限定活動。响1999年更首次上演主題賽事賀年杯，認真應節。
咁點解無啦啦會搞賀歲馬呢？記得以前大學教香港史又對賽馬有多年研究嘅老師所講，响六十年代社會動亂過後，港英政府就花咗大量人力物力去營造社會和諧氣氛，賀歲馬就係响呢個背景下出現，情況同後嚟六合彩出現有啲類似，可以話係為香港人提供一個精神寄託。當然！當年賽馬對香港人特別係男人而言係生活一部分，所以馬會就將賀歲馬愈搞愈大，等馬迷好合皮地入場鋪下草皮。
原圖嚟自網絡