以往阿史都同史友們介紹過唔同朝代嘅一啲特別嘅宮廷組織，就好似錦衣衛、東廠等等，呢啲組織一出基本都令到達宮貴人聞之色變，而喺清朝就有一個相當特別嘅組織會專門針對皇室成員，阿史今次就同大家講一講啦！
清朝皇室主要就係由兩個機構支撐，其一就係負責皇帝事務嘅內務府，而另一個正係阿史今次要介紹嘅「宗人府」。宗人府嘅職責就係要管理成個皇室，早喺明朝之時就已經創立，當時係負責管理皇族家譜、冊封等事宜，但去到清朝順治沿襲明朝舊制後，宗人府嘅職責亦都變得更廣泛，唔單止要負責皇室家譜纂修，仲要負責埋皇族俸祿、封爵、教育、婚喪嫁娶及任官等，管理嘅人數多達二十萬。
雖然宗人府係會為皇室成員提供唔少福利，但與此同時呢個機構亦都係負責處理賞罰，一旦有皇族犯罪，宗人府就會聯同刑部、戶部一齊進行裁決，小事就會罰錢解決，一旦犯下重罪、挑戰皇權，唔單止會被革去宗室資格，後來甚至仲會有專門嘅《王公處分則例》進行處理，王公貴族聽見都驚！
原圖嚟自網絡