响過去十日，即過年前後，史友們都應該跟從傳統習俗做咗唔少嘢，到咗年初六呢樣嘢就真係不得了，唔做唔得，就係「送窮」。
「送窮」係古代民間一種歲時風俗，寓意送走貧窮困苦，新一年有美好生活。至於呢個「窮」字，所代表唔單止係無錢駛，當中仲包含好多意思。响傳統上有「五窮」，又叫「五鬼」，唐代大文豪韓愈响〈送窮文〉中有提及過，五窮指「智窮、學窮、文窮、命窮、交窮」呢五隻窮鬼，要「遂三揖而送之」，後人就常以「五窮」嚟比喻厄運，當然要送走啦！
不過問題嚟喇！因為民間習俗當中，就對初五送窮定初六送窮有唔同講法。阿史又問過民俗學家朋友，佢話傳統上年初五係迎財神之日，而年初六先係「送窮」，不過响錢銀管理上迎財神同送窮算係同類概念，所以有人就會响初五迎財神時順手送窮，認為咁先夠發！
原圖嚟自網絡