近日內地兔年嘅新春賀年電影可以話係「神仙打架」，除咗有《流浪地球2》、《熊出沒之伴我「熊芯」》等國產電影高據票房前列之外，仲有由72歲張藝謀導演製作嘅《滿江紅》，單單係呢三部電影就已經令2023年內地賀歲檔總票房突破50億元，真係誇張！
《滿江紅》由沈騰、易烊千璽主演，隨住票房高漲，唔少電影嘅情節、演員嘅演技、用功等等都被廣大網友拎出嚟討論。而喺電影當中，唔少網友都直言最令大家印象深刻嘅一幕就係沈騰被上酷刑灌醋嘅場面。據相關幕後花絮，原來呢一幕足足就拍咗三次，而且就真係「跟足」歷史，將沈騰被上灌醋，演員嘅敬業亦都令到成件事相當逼真。之不過，歷史上又係咪真係有呢種酷刑呢？
其實類似嘅酷刑早喺東漢時期就已經出現，而刑具除咗係用醋之外，仲會用上煙熏灌鼻，雖然睇落好似好冇殺傷力，但據《新唐書.酷吏傳》中記載 ，呢種方式其實好快就會令受刑者求饒，由於醋、煙等等都係會對內臟帶嚟刺激性以及殘害，所以受刑者「不到一刻」就會頂唔住，所以電影嘅呢啲細節都係忠於歷史。
講到呢度，單單係一個細節就已經咁吸引人，阿史就當然希望呢套電影可以喺香港上畫，等大家都可以欣賞到一流嘅國產電影啦！
原圖嚟自網絡