喺中國歷史上，每逢朝代興替，舊有皇朝嘅皇族基本上都唔會有咩好下場，好多時候都會被新上任嘅君主屠殺，之不過清朝嘅皇族就好唔同，佢哋唔單止冇遭受到殺戮，反而仲受到唔少優待。咁到底喺清朝滅亡後，呢班皇族又去咗做啲乜呢？阿史今次就同大家講一講啦！
如果就咁提清朝皇族，可能史友們心目中嘅概念只係幾百、甚至幾千人，但受惠於清朝嘅福利政策，向每個族人都會按人頭發放金錢，所以喺光緒年間，據當時統計皇族嘅成員係直逼二十萬，絕對唔係一個細嘅數字。至於袁世凱制定嘅《皇室優待條例》，民國政府每年畀溥儀400萬銀元生活費，絕對就流唔到去呢班皇族手上，咁到底喺清朝滅亡後，呢班皇族失去生計之後又會做啲咩呢？
喺失去生計之後，唔少滿清皇族好快就面臨經濟問題，為咗養家唔少人都開始從事各行各業就好似老師、經商以及拉人力車都有，但講到最多人從事嘅，其實就係「警察」一職。喺當時嚟講，呢個職業唔需要太多勞動而且地位又高，靠住佢哋滿清嘅關係網又好易從事得到，所以喺民國初年，京城嘅警察局大部分都係滿族人！
原圖嚟自網絡