近期國產電影《滿江紅》响內地熱爆，而秦檜成為咗熱議嘅歷史人物。而阿史最近見到篇同秦檜相關文章，就係關於秦檜係咪金國放响南宋內應，其中一個支持論點就係話佢曾經為金國效力過。
話說响秦檜唔單止係南宋初期嘅權臣，其實佢响北宋末期就已經响朝廷為官。靖康之難後隨同徽、欽二帝被擄到金國，因為佢文采夠好，於是金太宗就將秦檜賜給佢細佬撻懶，亦即係完顏昌，所以秦檜一度為完顏昌所用。秦檜成為完顏昌手下後，升為參謀軍事。完顏昌响攻打楚州時，秦檜就曾為完顏昌寫過勸降書。之但係，秦檜為完顏昌效力時間唔係好長，响完顏昌攻破楚州後無耐，佢就將秦檜放歸南宋。
對於秦檜成功返回宋廷，佢自己就話係因為「殺監己者奔舟而歸」，不過宋高宗時期嘅宰相朱勝非就响其著作《秀水閒居錄》中說：「秦檜隨敵北去，為大帥達賚(即完顏昌)任用，至是與其家得歸。檜，王氏婿也。王仲山有別業在濟南，金為取千緡其行，然全家來歸，婢僕亦無損，人知其非逃歸也。」咁似乎秦檜能全身而退平安無事，並唔係佢自己講到咁神勇。
原圖嚟自網絡