史友們如果去過西貢郊遊，可能都去過鹽田梓呢個地方。呢個曾經係香港其中一個產鹽同曬鹽嘅地方，亦係香港其中一個新界原居民聚居之地。唔知史友們又知唔知，原來呢個地方同廣東一個地方好有淵源呢？
大概响二百年前，客家陳氏家族就响鹽田梓呢個小島落地生根，而陳氏先祖陳孟德夫婦就係由現今深圳地區遷居而來，而佢哋嘅原居地，就係寶安縣鹽田村，即現今深圳鹽田港附近。當地居民都係從事曬鹽、捕魚、農耕等工作，所以陳氏族人去咗鹽田梓後，就做返相關嘅工作。而鹽田梓個「梓」字係指鄉里，有不忘故鄉之意。不過有趣嘅係，以前政府嘅官方記錄就寫呢個地方做鹽田仔，據講係因為啲官將客家話嘅「梓」字聽錯為廣東話嘅「仔」字。可能有史友都知，大埔都有一個地方叫做鹽田仔，係吐露港內一個小島。