我哋好多時都話，古代女性都會識得刺繡。刺繡呢個工藝可以話係中國傳統其中一種好重要嘅藝術結晶，仲係歷朝歷代服飾當中一個重要元素。咁史友們又知唔知，其實廣州刺繡都好出名？
傳統上，粵繡、湘繡、蜀繡同蘇繡被譽為中國四大名繡，而粵繡就係由廣州刺繡同潮州刺繡合稱而成。講到廣州刺繡可以話係歷史悠久，响古代，嶺南一帶已經係養蠶取絲之地，响西漢時期，廣東一帶已出現刺繡工藝。好似南越王墓就出土咗繡紗、繡絹。
至於有文字記錄嘅，就可以唐人蘇鶚响《杜陽雜編》所載嘅一個故事中睇得到。當時一位叫盧媚娘嘅廣東姑娘响一幅一尺見方嘅絲絹上繡出一卷佛經《法華經》，字體比粟米仲細，而且點劃分明，呢個故事說明廣繡歷史悠久，同埋技藝有幾咁卓越超群。當時絲布亦係廣東一帶上貢朝廷嘅貢品之一，皇帝皇族都好鍾意，絲布就係以廣州刺繡工藝製作而成。响明代個陣，廣州對外貿易發達，廣繡成為民間重要手工業產品。曾經有葡萄牙人見到廣繡工藝品就話係「絕妙工藝品」。
有趣嘅係，呢種廣東工藝同另一廣東文化互相結合，就係粵劇喇！粵劇演員著嘅戲服，都係用咗廣州刺繡，而廣州狀元坊成為廣繡業嘅中心，廣州刺繡呢種工藝名氣就愈來愈大。
原圖嚟自網絡