關於慈禧太后嘅秘聞相信史友們都聽過唔少，例如每日都沖洗人奶浴、沖涼之時會用上過百條毛巾、食飯嘅時候會有過百道菜式等等，而以下嘅呢項秘聞可能大家都未必聽過，就係慈禧太后竟然有外國嘅情人？阿史今次就同大家講一講啦！
事源就係喺1898年之時，美國就有報社報導慈禧太后其實一直收埋一位外國情人，呢位名為巴克斯嘅英國貴族本身係一位作家，但就為咗尋找寫作靈感而嚟到中國，因為獨特嘅外型同埋才華就令到佢順利入到宮中，並且深得慈禧太后喜愛。而呢位慈禧太后嘅外國情人事後返到英國之後，就出版咗好多書籍講述慈禧太后秘聞，仲得到唔錯嘅銷量。
就咁聽到呢度，可能唔少史友都係半信半疑，但如果真係按書中嘅內容所講，兩人相戀之時，慈禧太后正正就係70歲，而巴克斯就只得29歲，呢一點本身就已經係一大疑點。而據後世學者進一步研究分析，呢位巴克斯其實就只係出生喺英國一個中產家庭，因為輸晒身家而嚟到亞洲想翻身，佢一度做過清朝使館，又賣過軍火武器，但最尾都係一事無成，勢估唔到出咗呢本假書先至爆紅。相信慈禧太后本人都冇諗過，自己都會被「假新聞」所連累！
原圖嚟自網絡