上次介紹過廣州天河區嘅中信廣場，一度係廣州最高同最著名嘅地標，不過今時今日講廣州地標，就一定會講到「小蠻腰」廣州塔喇！呢座落成得十幾年嘅電視塔，原來當年起個陣都有個小故事，就係被迫「變矮」。
廣州塔即係廣州新電視塔，位於廣州市海珠區。由於建築物中腰位置收窄咗，所以當地人就稱佢為「小蠻腰」。廣州塔具有廣播電視發射、文化娛樂同成為城市景點功能，而呢座電視塔興建目的，除咗增強市內廣播電波發射訊號外，仲有係為咗迎接2010廣州亞運提供轉播之用。不過，按當年原來設計廣州塔係高610米，其中塔身主體454米，天線桅桿146米。
不過咁，由於廣州塔處於飛機轉向區，按照規定，响飛機航線所處位置周圍300米內唔能夠出現障礙物，新電視塔上方飛機飛行高度為海拔900米，所以，為確保飛機飛行安全，塔頂天線就因此而削咗10米，最終廣州塔高度為610米減為600米，被迫「變矮」。
原圖嚟自網絡