一提起潘金蓮呢個名，可能唔少史友都會即時諗起《金瓶梅》對佢所刻劃嘅紅杏出牆、毒害親夫嘅形象，但歷史上呢位潘金蓮真實形象並唔係咁樣，反而係一位賢妻良母！
潘金蓮之所以被描繪成一位紅杏出牆嘅女子，原因其實好大機會同武大郎嘅真實形象武植有關！喺歷史上武大郎真名係武植，佢並唔係一個賣燒餅嘅矮小男子，反而係自幼文武雙全，甚至仲做埋山東陽穀知縣嘅一個人物。喺佢成名之前，就曾經得過一位好友嘅資助，而呢位好友後來亦都千里迢迢投奔武大郎，希望可以喺佢身上得到一官半職。
雖然武大郎對佢係真心相待，一直以嚟都拎最好嘅嚟招待佢，但就因為唔肯以權謀私為好友謀官位，呢位好友一氣之下就寫咗唔少謾罵諷刺武大郎、潘金蓮嘅小故事，最後仲落入埋曾經被武大郎治罪嘅西門慶手上，所有事情就係咁樣一發不可收拾。
而喺武大郎墓出土嘅一刻，墓誌銘文上嘅文字就講明一切：「武公諱植字田嶺，童時謂大郎，暮年尊曰四老。公之夫人潘氏，名門淑媛。公先祖居晉陽郡，系殷武丁後裔，後徙清河縣孔宋莊(今武家那村)定居。公幼年歿父，與母相依，衣食難濟。少時聰敏，崇文尚武，尤喜詩書，中年舉進士，官拜七品，興利除弊，清廉公明，鄉民聚萬民傘敬之。然悠悠歲月，歷歷滄桑，名節無端詆毀，古墓橫遭毀劫，令良士賢婦飲恨九泉，痛惜斯哉。今修葺墓室，清源正名，告慰武公，以示後人，是為銘記焉。」雖然墓誌銘並唔能夠明確還原到武大郎嘅真實情況，但至少可以講明武植為官清廉，而潘金蓮更係善良賢惠，勤勞仁義。
原圖嚟自網絡