之前阿史介紹咗粵劇响明清年代已經响廣東好盛行，講到風靡省港澳嘅話，就一定要介紹下民國時期薛馬爭雄之局。
所謂薛馬爭雄，即係兩大粵劇宗師薛覺先同馬師曾一同發光發亮嘅年代。馬師曾係順德人，年輕時賣身到戲館同新加坡嘅戲班，後嚟佢參與「人壽年劇團」《苦鳳鶯憐》演出，融會咗差利卓別靈詼諧身段，同時創造咗獨特嘅「乞兒腔」，大受歡迎，成為「文武丑」嘅一代宗師。至於薛覺先亦係順德人，年輕時加入戲班，成名後自組「覺先聲劇團」，實行自編自演粵劇曲目。
响1930至1940年代，太平戲院聘請咗馬師曾組織嘅「太平劇團」坐鎮，而高陞戲院就請咗薛覺先嘅「覺先聲劇團」坐陣，就係咁兩大戲院、兩大名班、兩大粤劇宗師就展開咗競爭，呢段時間亦係粤劇史上稱為「薛馬爭雄」嘅光輝歲月。後世人都認為，薛馬爭雄其實係良性競爭，佢哋二人亦將中國各地劇種元素甚至西方音樂舞台劇元素融入粵劇當中，令粵劇得以進步，兩大宗師對粵劇改良可以話係影響深遠。
原圖嚟自網絡