7-11便利店對港人而言,幾乎真係梗有一間喺左近,而令到呢件事成真,令到7-11便利遍布全球嘅重要人物日本億萬富翁伊藤雅俊就喺上星期因年老而離世,享壽98歲。
伊藤雅俊喺1956年就接手由佢叔叔經營嘅服飾店,並且改成為販賣各種雜貨嘅商店——伊藤洋華堂(Ito-Yokado)。喺好短嘅時間內,佢嘅雜貨店就喺各地持續擴充營運版圖,伊藤洋華堂亦都成為國內知名百貨連鎖店,並且喺1972年上埋市,真係誇張。
而喺佢上市嘅差唔多時間,伊藤洋華堂一名高層鈴木敏文喺美國考察期間就發現到一家7-11便利店,好快雙方就促成合作並且引進到日本。而喺1990年,伊藤洋華堂甚至仲買咗七成嘅控股權,之後就係將7-11便利店推廣至全球。目前7-Eleven已經喺全球設有83,000間分店,真係一個想像唔到嘅數字!
原圖嚟自網絡