之前阿史介紹過响明清時期廣東粵劇好盛行，仲搞到啲富家子弟掛住睇大戲唔做嘢。不過响粵劇盛行同時，响清代粵劇就曾經被禁十幾年，到底係乜嘢一回事呢？
講到呢件事，就要介紹一下紅船。紅船係以往粵劇戲班响兩廣河道間演出所使用嘅船隻，最初呢類船係紫洞艇，後來加上帆，船頭油成紅色，因而稱為紅船。而紅船主要係用於運載戲班成員同戲箱，戲班成員都係响船上生活，此類戲班亦稱為紅船戲班。
而响咸豐四年，即公元1854年，佛山著名劇館瓊花會館嘅一班粵劇藝人，就加入咗秘密組織響應太平天國起事。做粵劇變咗反清人士，下場自然係被政府取締，朝廷亦下令兩廣地區禁演粵劇十幾年。不過到咗十九世紀末二十世紀初，紅船粵劇又再次興起返，經常响珠江三角洲一帶演出。
原圖：takungpao