日前响奧斯卡頒獎禮中，越南出生嘅美國華裔男演員關繼威憑住《奇異女俠玩救宇宙》獲得第95屆奧斯卡金像獎最佳男配角獎，唔少香港影迷都替佢高興，唔單止佢參與過港產片製作，而且佢响細個果陣响香港嘅越南船民營生活過。
香港越南船民營可以話係上一代香港人一個集體回憶，話說响上世紀六七十年代，越南因為戰爭國民紛紛逃離家園，由1975年5月4日就有第一批為數3,743人嘅難民嚟到香港，當時港府係採取全數收容嘅政策。而之後幾年亦都陸續有難民嚟到香港，加上1970年代尾，英國政府就喺日內瓦簽署一項關於處理越南難民問題國際公約，就宣佈將香港列為「第一收容港」，去到1980年代所收容嘅難民就已經超過10萬人。
不過，當時政府對收容來港嘅越南船民都有唔同做法，所以越南船民營都有唔同類別。最早期船民營（當時稱難民營）都採取半開放管理模式，管理較為寬鬆，越南船民可獲簽發「難民證」，响日間進出營區，更可以响香港打工。但後嚟越南船民愈嚟愈多，响越南當地仲有謠言話嚟到香港就可以去到歐美國家。為阻止越南船民湧入，一方面實施甄別政策，另一方面就將船民營改為禁閉營模式，船民一般唔准離開營區。亦因為禁閉營環境太差，所以爆發過幾次造成人命傷亡嘅騷亂事件。
原圖嚟自網絡