繼續同史友們介紹一啲有趣嘅歷史趣聞，喺唔少影視作品當中史友們都可以見到達官貴人經常流連青樓場所，並且一出手就係一大堆銀兩，咁到底喺古代幫襯一次青樓又需要幾多錢呢？阿史今次就同大家講一講啦！
按常理嚟講，古代嘅青樓就相當於現代嘅高級娛樂場所，價錢自然唔會係平，但當中價錢嘅差異亦都係取決於唔同朝代以及姑娘嘅等級。由最基本開始講起，如果客人只係想進青樓望兩眼，咁由一踏入青樓開始就已經需要畀錢，如果點上茶類、食品以及花酒，就已經需要用上好幾兩銀，相當於現代嘅三、五千元。
而如果客人係想搵名妓嚟相陪、甚至仲想為對方贖身，咁價格就更加差天共地！假如只係最普通嘅相陪，咁明朝杭州名妓花不如作陪與見面費約6、7兩白銀，相當於現代嘅5000蚊；「秦淮八艷」陳圓圓唱一首歌同樣亦都需要6、7兩白銀、但陪食飯就需要5兩黃金，等同於7.5萬元。而假如動咗真感情，咁陳圓圓贖身更要一千兩黃金，相當於1千5百萬、而如果價格平啲嘅，《影梅庵憶語》記載董小宛就需要3千兩白銀，亦即係接近150萬左右，真係相當誇張嘅數字！
原圖嚟自網絡