响《漢書》、《後漢書》都記載咗一啲南洋地區同中原有政治、經濟上嘅交流,亦有文字記載話早於漢代已經有船可以開到去依家東南亞。咁史友們可能會諗响二千年前中國人係咪真係有咁嘅造船技術可以出海遠行呢?而廣州昔日一個考古發現就可能為呢個謎團提供到啲線索。
响1974年,廣州市文化局大院內嘅建設工程當中,發現咗一啲木結構古代遺跡,而遺址地處廣州市中心嘅一處台地上。相關挖掘工作响1975年開展,後經專家團隊考證,證實呢個地方係秦漢時一個規模巨大嘅船舶工場。响呢個遺址用有三個平行排列嘅造船台,而且仲有木料加工場,已發掘部分為東西長大約30米、南北寬約11米,單從遺址呢部分就可以推斷呢個造船廠規模相當之大,而且秦漢時期嘅古代造船工場遺址响內地極為罕見。而當年呢個考古發現,佐證到西漢時中原政權嘅船隊出洋嘅真確性。
有趣嘅係,呢個遺址埋响地下5米深處,距離今日嘅珠江北岸有成1300米,咁點解造船廠唔係起响江邊呢?專家估計係珠江受泥沙沖積令江嘅位置不斷南移,原來响江邊嘅造船廠就離珠江愈來愈遠。
原圖嚟自網絡