「荊軻刺秦王」嘅故事相信唔少史友都聽過，而呢個歷史事件嘅重點唔單止係喺圖窮匕見，而係當秦王面對住突如其來嘅刺殺之時，明明係想拔劍反擊，但就偏偏一時之間拔唔出劍，到底點解一國之君嘅劍會出現呢啲情況呢？阿史今次就同大家講一講１！
早前就同史友們介紹過考古團隊早喺2009年就開始對秦兵馬俑陪葬坑進行發掘，歷年嚟就已經清理出220件陶俑、16匹陶馬、4乘戰車等，當中就出土咗唔少兵器，就好似鈹、戟以及5把完整嘅青銅劍。相信大家萬萬都冇諗到，呢啲青銅劍就會成為解開「荊軻刺秦」謎題嘅重要證據。
呢5把青銅劍喺出土之時就係掛喺陶俑身上從未移動過，長度都係介乎喺88至91公分，係腰間配戴嘅劍。咁到底點解呢啲劍可以解答到「荊軻刺秦」謎題呢？原來喺《史記．刺客列傳》記載，當大臣們見到秦王拔唔出劍之時，曾經係大叫「王負劍」，但問題就係呢啲秦朝嘅劍都係喺腰間配戴，劍身太長嘅情況下係唔能夠垂直拔出，而係需要劍鞘向後推到後背位置先可以完全拔出，咁所以其他動作都會令到拔劍嘅行為變得困難！
原圖嚟自網絡