中國與中美洲國家洪都拉斯尋日正式建立外交關係,相互承認並建立大使級外交關係。其實近年中國同洪都拉斯響經貿上關係愈嚟愈緊密,好似中國入口當地嘅貨物就佔洪都拉斯入口比例大約兩成。
講到洪都拉斯呢個國家,其實響百幾年前已經同中國人扯上關係,呢個關係自然係有中國人響當地生活同落地生根,不過呢段歷史又同美國一段歷史有關。咁即係點呢?話說響十九世紀中葉,美洲就出現咗第一批去當地做苦工嘅中國人。但後嚟美國特別係西岸地區出現排華潮,後嚟更演變成實施排華法案。小部分響美國嘅華人為咗逃避美國人迫害於是就移居到中美洲甚至南美,而洪都拉斯就係其中一個目的地。
除咗由美國移遷至洪都拉斯嘅中國人外,響十九世紀末亦有一啲中國人由中國直接去咗洪都拉斯嘅種植園做苦工,而部分苦工響當地落戶,留下幾百名後裔,佢哋亦係洪都拉斯當地華人嘅主流。
不過,無論係由美國移民過去,抑或係苦工同佢哋後代,洪都拉斯華僑人數一直都唔算太多,據統計現時響呢個國家嘅華人華僑大約有8000人。
原圖嚟自網絡