近年韓國文化响香港非常流行,連帶韓式美食都普及起嚟,當中唔少人都鍾意食韓式炸雞。上次阿史同史友們介紹過,部隊鍋呢款韓式食品同美國軍隊大有關連,原來韓式炸雞都同美軍有一定關係。
响朝鮮戰爭期間,美國就派軍隊進入朝鮮半島,後嚟朝鮮戰爭告一段落,美國仍然有幾萬名軍人駐紥响韓國。呢批响韓國駐紥嘅軍人,慢慢影響咗韓國人嘅生活習慣。由於美軍唔少人都鍾意食美式炸雞,於是當地韓國人就靈機一觸,開始出售炸雞,而呢種炸雞就係韓式炸雞最初型態。
到咗上世紀六十年代,首家電烤雞响明洞出現,令韓式炸雞成為咗當時相當高檔嘅食品。而隨住韓國經濟起飛,韓國人收入增加,加上韓國國內養雞場愈來愈多,雞隻供應愈來愈多,所以韓式炸雞價格愈來愈大眾化。特別係韓國响七八十年代唔少地方實現城市化,炸雞就成為呢啲新興城市快餐文化中嘅食品之一。至於今時今日大家食到醬料嘅炸雞,就係响八十年代初出現,係由一間叫百力佳納嘅炸雞店所創。
原圖嚟自網絡