旅美接近二十年嘅大熊貓「丫丫」終於喺萬眾期待之下抵達上海浦東國際機場，而同機嘅仲有喺2月因為心臟病離世嘅大熊貓「樂樂」遺體，兩隻旅貓大熊貓總算係成功回國。
唔經唔覺「樂樂」、「丫丫」旅美就已經有二十年，咁到底呢種熊貓外交又係幾時開始呢？答案就係同尼克遜以及其夫人喺1972年展開嘅訪華有關。喺 1972年2月21日，美國總統尼克遜就帶同佢夫人展開咗震驚世界嘅訪華之旅，尼克遜夫人喺到達北京之後嘅第二日就隨即去到北京動物園參觀，並且同大熊貓展開咗親密接觸。
由於美方嘅人員喺訪問前同埋接觸大熊貓後都表示出對大熊貓嘅深切關心，所以中方亦都得知美方其實係想要大熊貓。結果喺訪問期間嘅一次宴會之上，時任國務院總理周恩來就藉送上熊貓牌香煙，向尼克遜夫人表示中方願意贈送兩隻大熊貓到美國。於是，大熊貓興興、玲玲就喺1972年4月到達美國華盛頓，中美熊貓外交就係咁樣展開喇！
原圖嚟自網絡