以往阿史同大家介紹嘅考古地點，不外乎都係山洞、雪山、海底以及地下嘅陵墓，但大家又有冇諗過，其實連廁所都可以考古呢？
據CNN、Live Science報導，近日由英國劍橋大學、以色列特拉維夫大學、以色列文物局組成嘅考古團隊喺耶路撒冷一個距今2500年前嘅古代石製茅坑進行考古。可能史友們會諗，茅坑都只係得啲糞便，到底又有咩好考古？但其實對考古學家而言，古人嘅糞便就等同一個豐富嘅資料庫，分分鐘仲會有唔少重大嘅發現。
正因為有呢個諗法，今次考古團隊就喺2500年前嘅古人糞便樣本當中搵到梨形鞭毛蟲（Giardia duodenalis），並且相關嘅研究結果仲發表喺《寄生蟲學》（Parasitology）期刊。喺呢次發現當中考古團隊就搵到梨形鞭毛蟲，呢種蟲就會令到人類腹瀉腹部絞痛、發燒、體重減輕，喺古代而言係會致命。而喺古代美索不達米亞醫療文獻顯示，距今3000年至4000年前就已經有痢疾紀錄，但相關嘅梨形鞭毛蟲遺跡就以今次嘅發現最為久遠。
雖然科學家無法通過呢次發現判斷到當時耶路撒冷到底有幾多人感染痢疾，但就可以通過古人茅坑沉積層已發現4種寄生蟲嘅蟲卵了解到當時嘅衛生情況，亦都推斷古代耶路撒冷呢類大城很可能係爆發疾病疫情嘅熱點。
原圖嚟自網絡