前晚講完巴勒斯坦，今晚嚟講吓以色列。世界盃將會喺下個月14號開波，呢個就全世界球迷都知，但係以色列公共安全部長爾登前日就表示，佢無意俾關押喺以色列嘅部份巴勒斯坦囚犯睇世界盃，如果俾佢喺6月14號前搵到禁止睇波嘅方法，咁將會有唔少巴勒斯坦人無緣今屆嘅世界盃。

以巴兩國一直都唔啱牙就全世界都知，但阿史估唔到以色列會絕到咁，對球迷嚟講，冇得睇世界盃簡直就係酷刑！講到以巴衝突，同土地嘅分配有好大關係。巴勒斯坦本嚟係阿拉伯人同猶太人嘅聚居地，喺羅馬帝國統治時期，大多數猶太人被趕出巴勒斯坦，流落去世界各地。歐洲大部份國家對猶太人並唔友善，不時都會發生一啲迫害猶太人嘅事件。後嚟納粹希特拉執政，將散落喺世界各地嘅猶太人集中起嚟，成600萬猶太人被屠殺。第二次世界大戰之後，喺美、英國支持底下，世界各地嘅猶太人大規模移居巴勒斯坦，再建立佢哋嘅猶太國，因此開始同當地嘅阿拉伯人不斷發生衝突。為咗解決衝突，聯合國決定將巴勒斯坦大部份地區分俾猶太移民，後嚟呢班猶太人就成立咗自己嘅國家——以色列。巴勒斯坦當然反對呢個分配，鄰近嘅阿拉伯國家埃及、伊拉克、約旦、敘利亞、黎巴嫩同樣不滿，於是向以色列宣戰，引爆第一次中東戰爭。戰爭結束之後，以色列嘅領土又擴展咗5000km2，當果啲四處避難嘅巴勒斯坦人想返自己屋企果陣，已經被以色列築起嘅高牆隔絕在外。

以色列建國之後，先後進行4次領土擴張，巴勒斯坦人嘅領土越嚟越細，「土地日」嘅誕生，就係因為巴勒斯坦為咗捍衛領土而發起嘅罷工遊行。而自從2001年以色列總理沙龍上任之後，主張以強硬手段處理巴勒斯坦問題，兩國嘅關係就更加惡劣，紛爭不斷。