阿史睇新聞話呢幾日巴基斯坦受熱浪侵襲，南部城市卡拉奇嘅氣溫更加高達44℃，又適逢過去30日係伊斯蘭教嘅齋戒月，教徒嚴守戒規，白日唔食嘢唔飲水，多人中暑而死。

卡拉奇係巴基斯坦信德省嘅首府，因為位處赤道附近，全年嘅平均氣溫較高且雨量少，夏季最高溫度可高達47℃。卡拉奇原本只係印度洋嘅一個小漁村，直至1839年英國佔領卡拉奇將佢變成陸軍總部，再同木爾坦建立航運之後，卡拉奇就開始慢慢發展成印度河嘅主要港口。

宜家嘅卡拉奇仲係巴基斯坦最大嘅軍港，國家嘅海軍部隊都主要駐守係呢度。除咗海軍部隊，卡拉奇仲有唔少海軍學院、海軍情報處等等。

題外話，雖然香港冇卡拉奇咁熱，但宜家日頭溫度閑閑地都有30℃，需要出戶外工作嘅史友們記得做好防暑措施，唔好熱親。