喺1990年今日，東德併入西德，令二戰後分裂嘅德國終於完成統一。

納粹德國早年喺二戰中戰敗，戰後根據《波茨坦協定》，德國一分為四，分別由英、美、法、蘇四國佔領，之後英、美、法三國同蘇聯分別成立西德同東德兩國。直至80年代尾，東歐政局不穩，大批東德人湧入西德，之後柏林圍牆倒下，為統一鋪平道路。喺1990年3月，東德出現政黨輪替，東德基民盟上台執政，喺8月31日通過同意簽訂《統一條約》。同年9月12日，四個二戰戰勝國家（美、英、法及蘇聯）同東西德簽署協定，為兩德統一掃除最後障礙。到咗10月3號東西德正式統一，前後不足一年，可以話係相當突然。

喺咁急促嘅時間下統一，亦令德國之後出現唔少經濟同社會問題。德國現任總理默克爾於上半年講過，兩德統一之後，東西部聯邦州之間仍然存在差距，例如東部人均國民生產總值只有西部嘅73%，財政同稅務收入都低過西部，令政府要諗計仔，响科研、失業等方面著手，平衡東西部嘅差距。