閃令令嘅鑽石,梗有唔少人中意,而大大粒過百卡嘅鑽石,就成為多國嘅爭奪對象。曾經係世界最大粒嘅鑽石「光之山」目前鑲嵌於英國王冠之上,不過英國同印度一路以嚟都爭拗粒鑽石究竟屬於邊一方,連伊朗、巴基斯坦同阿富汗都爭埋一份。望返歷史,原來粒鑽石都幾陀衰家,可以話係集「榮耀與詛咒」於一身。

印度莫臥兒王朝嘅帝王沙賈汗,即係興建泰姬陵嗰位,佢嘅孔雀寶座據講係史上最華麗耀眼,鑲嵌咗幾代王朝留低嘅無數珍寶,包括粒「光之山」,有講法話寶座嘅價值等於興建泰姬陵費用嘅四倍。後嚟波斯遠征印度,個寶座就被搶走咗。

隨住時間推移,粒鑽石換咗唔少個主人,後嚟錫克族(約目前印度西部旁遮普邦)國王辛格從一個避難嘅阿富汗親王手中得到鑽石,佢1839年逝世後,錫克族同英國爆發戰爭,錫克族戰敗後,辛格得10歲嘅仔就將鑽石雙手奉送予英國人,令「光之山」成為殖民帝國掠奪印度嘅象徵。

一直有傳聞話,「光之山」會詛咒佩戴它嘅男主人,女人就無事。自從維多利亞女王之後,粒鑽石只由國王嘅另一半佩戴,包括英女王伊麗莎白二世嘅媽媽。

2010年英國時任首相卡梅倫出訪印度時企硬say no,仲話粒鑽石會繼續留响英國,如果應承歸還,為海外文物「回家」開咗個頭,「你會發現大英博物館入面咩都無」。