宜家嘅商場店鋪多不勝數，想買乜都好方便，雖然可能少咗人會特登去百貨公司買嘢，但於香港生活嘅大家，肯定聽過永安百貨呢個名。永安曾經係香港最受歡迎嘅百貨公司之一，亦係上世紀上海灘四大百貨之一，由郭氏兄弟郭樂同郭泉創辦。

郭樂同郭泉祖籍廣東中山，六兄弟自幼家貧，排第二嘅郭樂17歲就去澳洲謀生，先喺墨爾本嘅農場做過苦力，隨後喺同鄉馬應彪（先施創辦人）嘅永生公司度打工。無幾耐，悉尼一家華商開辦嘅「永安棧」果欄出售，郭樂就同幾個好友集資買咗佢，改名為永安果欄，之後郭家兄弟相繼去澳洲，協助打理永安果欄，包括排第三嘅郭泉。

喺郭氏兄弟嘅合力經營下，永安果欄後來居上，超越馬應彪嘅永生公司，成為悉尼最大果蔬批發商。但郭泉睇到永安果欄嘅供應並唔穩定，就向哥哥郭樂提議：「兄弟最好不要老窩在一起發財，應多辟幾條財路。」於是，郭泉就用郭樂借俾佢嘅本錢，喺斐濟設立公司，開闢種植園，為永安果欄奠定咗穩定嘅供應體系。之後郭泉仲建立收購站、經營百貨推銷，主要從當地居民手中收購貝殼、海參等特產，再轉賣或出口。

自從馬應彪喺香港創辦咗先施百貨之後，郭氏兄弟靜觀其變咗一段時間，覺得開百貨公司有利可圖。於是，1907年，郭泉用16萬港幣創辦咗香港永安百貨公司，啱開業果陣，公司得一間店鋪，店面亦比較簡陋。不過，由於經營有方，永安嘅營業額迅速上升。積累到足夠嘅經驗同資本之後，郭氏兄弟將目光放喺當時國內最發達嘅城市——上海。當時上海最繁華嘅道路係南京路商業街，不過兩兄弟唔知選址應該喺南邊定北邊，於是佢哋請咗兩個人分別去南北兩邊，一有人行過就放粒黃豆落袋，以統計南北兩邊嘅行人數量，幾日之後，佢哋扑鎚揀南京路南邊。

由選址到開張搞足3年之後，上海永安喺1918年開業，商品種類達到4000種之多。而開張當日，營業額達一萬幾港幣，開創業界先河，令永安百貨傲視上海灘。據講，郭樂係首先提出「顧客永遠是對的」嘅服務概念，「得罪一個顧客，就等於趕走10個客。接待好一個顧客，等於從對手度搶嚟10個、100個顧客。」

圖為郭氏兄弟（左：郭泉，右：郭樂）同上海永安。網絡圖片