上年沙特阿拉伯、馬爾代夫、阿聯酉、埃及、巴林、也門、利比亞陸續同卡塔爾斷交嘅新聞一出，舉世矚目，雖然卡塔爾已經唔係第一次被周邊國家杯葛，但都令好多人再次關注卡塔爾嘅外交。不過，阿史今日並唔係想討論卡塔爾嘅外交，而係分享吓响多哈做嘢嘅史友嘅所見所聞。

卡塔爾有錢全世界都知，但到底佢哋有錢到咩程度呢？據講，當地嘅學生（指嘅係土生土長嘅卡塔爾人）得果十六七歲，揸出嚟嘅車唔係Benz，就係Cadillac之類嘅靚車。讀緊書嘅學生妹用嘅化妝品啊，手袋啊都係Chanel、LV等等嘅名牌。如果當地冇得買，佢哋就搭40分鐘機去杜拜買，好喇如果杜拜都冇得買，就直接飛去歐洲或者美國買。果然，有錢就係任性！

真正嘅卡塔爾人一出世就有國家補貼，係唔需要俾錢去交水電煤費之類嘅費用嘅，睇病都唔洗錢（卡塔爾嘅社會保障非常好，就算唔係當地人，病咗去睇醫生都好平）。可以咁講，土生土長嘅卡塔爾人係唔需要為生計煩惱嘅，佢哋只需要識享受生活就夠喇。但係一班去卡塔爾讀書或者做嘢嘅外國人就冇當地人咁好福利喇，因為卡塔爾好多日常用品都係由外國入口，所以物價非常高，日日都要捱貴水、貴菜。