唔知大家有無睇過《末代皇帝》呢部戲？佢係1987年根據滿清最後一個皇帝溥儀嘅經歷，以真實嘅紫禁城做場景而拍，仲由香港出世嘅華裔演員尊龍擔任主角。齣戲令溥儀呢位經歷過人生大起大落嘅末代皇帝成為國際知名人物，今日就等阿史帶大家回顧下佢嘅一生。

只得三歲、仲係細路嘅溥儀1908年被慈禧推上帝位，由父親載灃擔任攝政王。1911年辛亥革命爆發，大清各個省份相繼宣告獨立。次年，隆裕皇太后宣布《退位詔書》，溥儀正式退位。之後佢因為《清室優待條件》，依然可以繼續住喺紫禁城同埋有宮人伺候，另外仲有英國籍老師莊士敦教佢英文、數學等西方知識。快樂嘅時光過得特別快，1924年，馮玉祥、胡景翼同孫岳發動北京政變，要求溥儀簽署宣統皇帝退位聲明，並派人將溥儀逐出紫禁城。據講出宮前，溥儀為近六百個宮女同太監發放遣散費，有太監嫌10元大洋太少，到衙門前抗議。

除咗做過滿清末代皇帝，溥儀之後再做多次所謂嘅「皇帝」。滿洲事變之後，日本關東軍俾溥儀喺滿洲國執政，溥儀於是响1934年登基成為康德皇帝。不過佢喺滿洲國並無實權，所有重大決策都要等日本關東軍批准先可以實行。六年後，溥儀秘密聯繫薩爾瓦多，希望佢哋可以幫助自己擺脫日本嘅控制，薩爾瓦多答應咗，可惜禁衛隊將逃跑計劃洩露俾日軍，搞到溥儀得個桔。1945年，日本宣佈投降，溥儀亦都係同年宣佈滿洲國滅亡。五年之後，溥儀同其他戰犯被送往撫順戰犯管理所，接受為期10年嘅勞動改造。

溥儀直到1959年先被特赦，成為中華人民共和國公民，其後被分配去中國科學院北京植物園做植物護理員同售票員，跟住加入政協全國委員會，任文化歷史資料研究委員會專員。佢生前嘅感情生活雖然豐富，但都無留低後人。而喺1967年今日，溥儀因病逝世，終年61歲。