相信去過大西北嘅朋友，都會對外形好似pizza，但係又無餡嘅麵包類食物唔陌生，其實佢就係新疆特色食物之一——饢。阿史之前去旅行都食過，不過最印象深刻嘅，唔係饢餅嘅味道，而係整嘅方法。

要製作饢餅，首先要將麵團和好發酵，和面時加入油、牛奶同雞蛋，令烤出嚟嘅饢酥脆香口。有啲比較講究嘅饢餅，中間位置會戳上花紋，並撒啲芝麻上面。

整好嘅麵團會放入特製嘅高溫坑入面烤製，阿史記得啲整餅師傅好似完全唔怕熱，伸隻手入去一放，個白雪雪嘅饢餅就已經穩穩陣陣貼住饢坑。阿史望住啲師傅嘅工序其實好驚驚，因為有個兄弟只係企埋個饢坑旁邊，就已經熱到頂唔順要行開。

一開始食，阿史覺得口感好似麵包，不過更加香脆同稍硬，後來老闆話有其他食法，例如將啲清燉羊肉或者大盤雞放响饢上面，就變成阿史命名嘅「pizza版新疆菜」，即刻好食好多。

《辭海》入面話，饢係波斯語，指「麵包」，喺伊朗、中亞和南亞，有唔少民族都會食。講返新疆，饢嘅歷史悠久，唔少史料都有記載，新疆博物館入面有吐魯番出土、唐朝嘅饢，證明2000多年前吐魯番人就識整饢。今時今日，饢已經變成新疆人飲食文化中不可或缺嘅一部分，好似除咗pizza形狀，仲會因應地域和民族習慣不同，而出現半球狀或長面片形添。