宜家大陸好多地方都有「新疆烤羊肉串」嘅流動燒烤檔，阿史有時聞到陣味好吸引，都會忍唔住買返串嚟食，不過就點都食唔返之前係新疆烏魯木齊食果陣味。

唔記得幾多年前，阿史參加咗個去烏魯木齊嘅交流團，係條街度行緊嘅時候，離好遠已經聞到陣燒烤味，追隨住呢陣味，有個戴住頂白帽嘅維吾爾族叔叔（阿史果陣仲好後生吓）係個火炭爐前面烤肉串，一串串肥、瘦肉隔住嚟串嘅烤肉被炭火燒到滴油，個叔叔純熟咁將啲肉串來回翻轉咁燒，然後搽上秘制醬汁，撒啲辣椒粉、孜然粉係肉串上面，引到阿史流晒口水，當堂買咗2串。啱燒好嘅肉仲有熱煙出，阿史已經唔理熱忍唔住食咗粒先，唔試由至何，一試真係驚豔咗阿史嘅味蕾！出面小小焦脆，但内裏肉質鮮嫩，啱啱熟透咬落去仲係JUICY嘅，一啲都唔乾，配埋秘制醬汁、辣椒粉同孜然粉果種香辣，阿史連續食咗幾串，真係食到停唔到口！阿史本身好怕食羊肉，因為驚佢果陣臊味，但果次食嘅羊肉串嘅臊味完全被啲秘制醬汁掩蓋，所以阿史食得好開心。個叔叔見到我買完又買，食到舐舐脷個樣，佢又自豪又好笑。阿史已經唔記得果陣一共食咗幾多串，剩係記得果餐齋食肉食到飽。

題外話，新疆嘅烤肉絕大部份係指烤羊肉，因為維吾爾族人係嚴禁食豬肉嘅，所以有機會去新疆嘅史友一定要試吓當地嘅烤肉！雖然唔係檔檔都咁好味，但試咗一定唔會後悔，因為當地嘅烤肉一定好食過廣東省入面果啲烤肉檔。