「羌笛何須怨楊柳，春風不度玉門關。」相信唔少讀過唐詩或者睇過古裝劇嘅史友，都應該聽過呢句詩，咁究竟玉門關响邊呢？除咗宜家响甘肅郭煌嘅玉門關遺址之外，原來歷史上仲有另外兩個玉門關。根據唐代僧人道宣嘅《釋家方誌》記載，由大唐出使去印度，其中一條路係經由涼州（今武威市）去甘州（今張掖市），再到肅州（今酒泉市）先到一個叫「故玉門關」嘅地方，而呢個「故玉門關」就响肅州西北方嘅「南北山（祁連山和黑山）間」，由此可以推斷出「故玉門關」就係酒泉嘅石關峽，呢個玉門關係有記載以嚟最早嘅。

跟住仲有一個喺瓜州縣嘅雙塔堡附近，據《大慈恩寺三藏法師傳》記載，玄奘响公元629年抵達瓜州晉昌城（今鎖陽城）嘅時候，問西行嘅路，有人話俾佢知「從此北行五十餘里有瓠蘆河（今疏勒河）」呢條河深不可渡，必須經玉門關度過，而呢個玉門關就响雙塔堡附近啦。不過，想去雙塔堡實地考察嘅史友，睇怕都要失望而回，因為宜家嘅雙塔堡玉門關已經被雙塔堡水庫淹沒，想睇玉門關遺址？恐怕要識潛水先得。